Tertib Acara Ibadah Jumat Agung (Bahasa Batak Toba)

TERTIB ACARA IBADAH JUMAT AGUNG

GEREJA PROTESTAN PERSEKUTUAN (GPP)

RESORT TAPANULI UTARA I

Jumat, 25 Maret 2016

Thema: “Nunga be dipadame hita di bagasan Kristus Jesus”

--- Mangkuling Giringgiring, Martangiang na Hohom ---

1.   Pangaradeon (U: Uluan, H: Huria)

U    :  Hamu angka dongan na hinaholongan ni Tuhanta Jesus Kristus. Dibagasan tingkion naeng pungkaonta ma parpunguan parningotan hahamate ni Tuhan Jesus. Taloas ma Tondi Parbadiai mangarajai roha nang pingkiranta be, Jesus nauang mate jala mulak mangolu di ari patoluhon, ido naeng pujionta ro di salelengnilelengna. Bongoti hamu ma angka bahalNa marhitehite hamauliateon dohot pujipujian. Mauliate ma rohamuna tu Ibana, puji hamu ma goarNa.

H    :  Tompa ma roha na ias dibagasan ahu, ale Debata, jala paimbaru ma tondi na marsihohot dibagasan ahu.

U    : Tapahohom ma rohanta, tapaserep jala tapaunduk ma dirinta di toru ni silang ni Tuhanta i, marende ma hita sian BE No. 449: 1-3 “Sai solhot tu silangmi”.

1.     Sai solhot tu silangMi, Jesus ingananku, Mual na mabaor disi, ima inumonku. SilangMi, Tuhanki ima pujionku, paima sogot sahat au, i endehononku.

2.     Lao ma au tu silangMi, i haporusanku. Sai asi ma rohaMi, unang tulak ahu. SilangMi ...

(jongjong)

3.     Domu ma tu silangMi, i ma tioponku, Asa unang lilu au, Ho ihuthononku. SilangMi...

2.   Votum/Introitus

U    :  Marhitehite Goar ni Debata Ama dohot Goar ni Anak-Na Tuhan Jesus Kristus dohot Goar ni Tondi Parbadia na tumompa langit dohot tano on. Amen.

         Saor ma Ho tu rohanami, ale Debata Ama, Anak dohot Tondi Parbadia.

H   :  Ai haotoon do hata na taringot tu silang i di roha ni angka na laho mago.

U    : Alai hagogoon ni Debata do i di hita na dapotan haluaon.

H    :  Alai Kristus na tarsilang i do hujamitahon hami, pargasipan do i dihalak Jahudi, haotoon disipelebegu.

U    :  Alai di angka natarjou i, nang Jahudi nang Gorik, gabe hagogoon ni Debata dohot habisuhon ni Debata do Kristus i. Alai sian Ibana umbahen na dibagasan Kristus Jesus hamu, ai Ibana do gabe habisuhon dihita sian Debata dohot hatigoran dohot habadiaon dohot haluaon. Haleluya.

H   : (Mangendehon)  Haleluya, Haleluya, Haleluya.

U    :  Martangiang ma hita: (Agenda GPP VII/2).

(hundul)

3.   Marende BE No.77:1,2   “Hamu Saluhut Halak”                  

1.   Hamu saluhut halak ro ma hamu manatap hangoluanmu on, Na gantung diparsilang, tu mahan hamatean; Naeng ingotonmu i tongtong.

2.   Patangkas ma luhutna; Sap mudar do dagingNa, sai hir hodokNa i; Buas huhut hosaNa hinorhon ni bernitNa, modar sude dagingNa i.

4.   Singkat ni Patik:  1 Korint 1:18-21

Ai haotoon do hata na taringot tu silang i di roha ni angka na laho mago; alai hagogoon ni Debata do i di hita na dapotan haluaon. Ai na tarsurat do: “Huagohon habisuhon ni na bisuk jala hubolongkon roha ni parroha.” Didia ma na bisuk? Didia ma sibotosurat? Didia ma parsinabul di tano on? Nda gabe haotoon habisuhon ni portibi on dibahen Debata? Ai mangihuthon habisuhon ni Debata, ndang ditanda portibi on Debata marhite dalan habisuhon; gabe dihalomohon Debata ma paluahon angka na porsea i marhitehite jamita haotoon.

5.   Marende BE No.84:1,2  “Aut Na Ginorga Tu Rohangku” 

1.   Aut na ginorga tu rohangku bohiM di na lao mate Ho. Aut na huingot, o Tuhanku, tongtong, pangkophopMi di au. Ai ho do paluahon ahu, dosangku do pinorsanMi; Di daoni Ho parsahitonku, martua au binahen nii.                                                                                        (jongjong)

2.   Sai jalo ma’au, ale Tuhanku, baen upa ni na tinaonMi. Sai naeng ingoton ni rohangku, tung sasude na binaenMi. Humophop au pardosa godang, dibahen holong ni rohaM. Hinorhon ni tarbaen au sonang, lao mandapothon banuaM.

  

6.   Panopotion ni Dosa

U    :  Hamu ale angka dongan! Ida ma Tuhan Jesus Kristus Anak ni Debata. Ditaon Ibana na hansit, dipukpuhi pamatangNa, diinsahi, ditijuri. Soada hasalaan dohot dosa diula Ibana. Haluaon do na naeng boanonNa tu hita dohot portibi on.

H    :  O Tuhan, tung ala ni hajahatonku dohot pangalahongku, ingkon taononMu na hansit. O Tuhan Jesus, birubiru ni Debata, asi ma roham di hami, sesa ma dosanami.

U    :  Hamu Ale angka dongan, songon i ma holong ni roha ni Debata di portibi on, dibagasan anak-Na Tuhan Jesus Kristus, dihophop do sude dosa dohot hajahatonta. Alai molo tapamanat jala ta sulingkit sude parulaonta, tung jotjot do hita manimbil sian lomo ni roha-Na. Ndang tahaholongi donganta songon dirinta sandiri, sai tongtong dope mian hita di angka ragam ni pangalaho hajahaton. Siala parulanta na so ture, gabe ta panghilalahon do hasusaan dohot lan hapariron dingolu on.

H    :  O Tuhan, jotjotnai huhalupahon hami panghophoponMi, dibagasan ngolu nami. Nuaeng hutopoti hami ma sude angka dosa pangalaosion nami tu adopan-Mu. Ale Tuhan Jesus birubiru ni Debata asima rohaM di hami, sesa ma saluhut dosanami.

U    :  Ale Tuhan! Tung balga do holongMu di hami, ndang tarasam hami marhite sere dohot perak. Nuaeng jongjong ma hami di adopanMu manopoti  sude dosa nami na godang i, asi ma rohaM di hami. Martangiang ma hita dibagasan rohanta be ...

(Holan organ BE No.212:1)

L2  : Tabege ma baga-baga ni Debata taringot tu hasesaan ni dosanta: (Agenda GPP D10)

(hundul)

7.   Koor/Vocal Group: R/NGPP

8.   Marende BE No.81:1,6 “Aha ma Endehononku”   

1.   Jesus, mual ni ngolungku, sipangolu tondingki. Ai dibunu Ho musungku, i ma hamatean i. Ho manaoni hamagoan, patupahon hangoluan. Alani hupuji Ho, tung marribu hali do.

2.   Sai pinuji ma GoarMu ala ni na bernit i. Dohot ala ni mudarMu Jesus, na nilehonMi. Lao pasaehon dosanami, asa unang mago hami. Ho hupuji ala ni salelenglelengna i.

9.   Epistel: Psalmen 39:1-6

U    :  Ende sian si Daud siendehonon ni si Jedutun.

H    :  Ninna rohangku do: Sai jagaonku do angka pangalahongku maradophon dosa marhite sian dilangku, jagaonku do huntam ni pamanganku, saleleng di jolongku dope parjahat i.

U    :  Sai mangungu do ahu mangkohomhohom, sai sip do ahu maradophon hauntungon, alai sai gunsang do ianggo parniahapanki.

H    :  Sai mohop do ateatengku di bagasan ahu, lam hupingkiri, lam marjimbur do api, gabe mangkuling ma dilangku:

U    :  Sai pabotohon ma tu ahu, ale Jahowa, ajalhu sogot dohot suhatsuhat ni ariaringku na otik i, asa huboto na gale do ahu hape.

H    :  Ida ma, marsasantopap do angka ariaringku dibahen Ho, jala sobokkon soada na ma adamhu di jolom, alogo sambing do sude jolma, nang pe hot jongjong.

U    :  Martua ma angka natumangihon hata ni Debata jala naumpeopsa. Amen.

10. Koor: Punguan Ina 

11.          Marende BE No.83: 3,4 “Na  Lao do Birubiru i”                 

3.   Na olo au, ale Amang, sian sandok rohangku. Pasauthon lomo ni rohaM, roham sambing do guru”. O holong ni rohaNa i! Tung aha do tudosanMi, Na songon Ho margogo? Dilehon Debata hape AnakNa, lao manaon sude sitaonon ni na mago.

(jongjong)

4.   Saleleng na mangolu au, naeng ingotonhu Jesus. Sude na binaenMi di au, HataM naeng hupatulus. Ho naeng haholonganku do, huhut ihuthononhu, Ho di dalan hangoluan tung ingkon Ho, nampuna ahu. Mangolu manang mate, sai Ho do tioponku.

12.          Manghatindangkon Haporseaon

13.          Koor: Punguan Ama

14.          Tingting/Sunggulsunggul

15.          Tangiang Pangondianon

16.          Ayat Pelean:         Markus 4:24 (Laos didok ma tu nasida: Manat ma hamu di na binegemuna; ai parsuhatonmuna do sisuhathononhon tu hamu, tambaonna dope tahe tu hamu!)

17.          Marende BE No.86:1--- “Silang na Badia i”     (Pelean I & II)

1.   Silang na badia i, Ho do lombulombungki. Maralohon dosa i, Dohot pandelean i. Di sude sitaonon i, Ho ma lombulombungki.

2.   Nasa na hu ula i ndang tau hasonanganki; Nang ringkot pe rohangki, Pola  ro nang ilungki; Holan asi ni roham pangurupi, o Tuhan.

----- O r g a n -----

3.   Ro do au nuaeng tu Ho, sai palambas ma roham; Nunga pola mate Ho, Ala asi ni rohaM;  Jangkon au na dangol on, sai ulosi tondingkon.

4.   Dosa patundukkon au, Ho ma mangondihon au. Ramun situtu do au, MudarMi mamuri au; Na pogos, dangol au on, Ho ma artangki tongtong.

 

18.          Jamita: Johannes 19:28-30

²⁸Jadi dung diboto Jesus, naung marujung saluhutna, asa jumpang na tarsurat i, ninna ma: Mauas Ahu!

²⁹Jadi adong ma disi isian ni tuak na asom, jadi dibutongi nasida ma limut tubagasan tuak na asom i, dipalohot ma i tu sada tolong, laho manurdukkon tu pamanganna.

³⁰Jadi dung dijalo Jesus na asom i, ninna ma: Nunga marujung! Dung i dipaunduk ma uluna, pasahathon tondina.

19.          Marende BE No.412:1--- “Ndi di Dolok Adui”   (Pelean III)

1.   Ndi, di Dolok adui, silang ni Tuhan i, sap mudar, sap tijur do i. Jesus mate disi, asa malum dibaen sude angka gondok roha i. Dibaen i, tung holong rohangki mida silang di Golgata i. Hupasolhot diringki tusi, dompak surgo pardalananki.

2.   Dileai jolma i silang ni Tuhan i. Hape haluaon do i. Nang godang dosangki, alai sesa do i, dibaen mudar na durus disi. Dibaen i ...

----- O r g a n -----

3.   Na mabaor sian i mudar ni Tuhan i. Na tau paiashon au on. Tung na bernit di taon Tuhan Jesus disi, paluahon sude hita on. Dibaen i ...

4.   Hona insak do au, raphon silang au lao, saleleng di portibion. Sogot tumpal hape, siteanon muse. Ni na rap dohot Jesus dison. Dibaen i ...

20.          Tangiang Pelean

      Tangiang Ale Amanami

      Pasupasu

      Amen-Amen-Amen.